Blog Biblioteca IES Saturnino Montojo

 Capitaneado por Rocío Piñón, profesora de Química e por Julia Ríos, profesora de Matemáticas, o noso alumnado celebrou o Día da muller e a nena na ciencia (11 de febreiro).    As nosas compañeiras científicas encargáronse de organizar unha serie de xogos durante os recreos dunha semana para que os nosos rapaces e rapazas máis novos puideran familiarizarse con mulleres que desenvolveron e desenvolven actualmente un papel exitoso no mundo da ciencia.   E polas súas mans pasaron pioneiras como Marie Curie, Ada Lovelace ou Rosalind Franklin… pero tamén outras figuras menos coñecidas (pero non menos relevantes) como a ferrolana Rebeca Atencia. Quen sabe se espertamos alguna vocación con esta entretida actividade... VÍDEO: " ACTIVIDADE PRÁCTICA "  

 Coa intención de que o noso alumnado reflexionase sobre a visión que nos achegan a música e a literatura sobre o amor, ocupamos o noso curruncho de exposicións con cancións de temática amorosa.  A partir da súa lectura, elaboramos comentarios críticos sobre aquelas cuestións amorosas que nos resultan pasadas de moda ou pouco apropiadas para a nosa visión actual do tema.

 Aproveitando a celebración do día de San Valentín organizamos un faladoiro para que o noso alumnado reflexionase sobre a nosa concepción do amor e sobre a necesidade de mudar algunha das crenzas máis profundas sobre o sentimento amoroso porque... Todos temos realmente unha media laranxa? Son os ciumes manifestacións amorosas ou simplemente mostras de posesión? Existe a persoa perfecta? Cambia o amor cos anos ou sempre temos o mesmo xeito de amar? Baixo a moderación da nosa compañeira Sara, os nosos rapaces e rapazas abriron o seu corazón e compartiron os seus pensamentos sobre este tema tan importante na súa idade. E descubrimos que, a pesar da súa xuventude, todos e todas teñen ideas moi claras sobre un sentimento tan universal, tan intenso e tan controvertido coma este.   Vídeo: O noso alumnado reflexiona  

  Durante o 16 de febreiro celebramos o entroido no noso instituto. Nesta ocasión propuxemos un "Entroido literario" a partir do lema deste ano na biblioteca: "De pista en pista, investigamos e aprendemos".  A xornada desenvolveuse cun desfile individual ou en grupos en que os alumnos e alumnas do noso centro mostraron os seus mellores traxes de detectives acompañando a súa actuación con música e bailes.