Blog Biblioteca IES Saturnino Montojo

  O 25 de novembro celebramos o Día Internacional da Eliminación da Violencia contra a Muller coa intención sensibilizar ao noso alumnado ante a violencia que moitas mulleres padecen en diferentes lugares do mundo e, sobre todo, para reivindicar unha maior igualdade entre homes e mulleres en todas as facetas da súa existencia. Durante todo o día desenvolvemos diferentes actividades en que participou toda a comunidade educativa. En primeiro lugar, os nosos alumnos e alumnas investigaron sobre o número de mulleres asesinadas en España durante o ano 2023. Cos seus nomes construímos un muro da vergoña que posteriormente derrubamos nun acto reivindicativo.  

 Con intención de celebrar na Biblioteca o mes da ciencia en galego, Rocío Piñón e Julia Ríos, profesoras do ámbito científico e membros do noso equipo da biblioteca, organizaron durante varios recreos unhas xornadas destinadas a que o noso alumnado puidese participar na experiencia de empregar uns lentes de realidade virtual.   Foi unha iniciativa que acadou un grande éxito entre o noso alumnado, que desfrutou da posibilidade de viaxar a Marte, navegar pola Vía Láctea ou visitar o interior dunha célula, sempre de xeito virtual.

  Con intención de celebrar o mes da ciencia, convertemos a nosa biblioteca nun laboratorio no que expuxemos os traballos dos nosos científicos máis novos.

  Durante o presente curso académico, e para celebrar o Samaín, botamos man do noso equipo de Voluntariado e de Correspondentes e fixemos unha sesión de lecturas terroríficas entre o noso alumnado máis novo.  Coa axuda dos departamentos de Lingua Castelá e Lingua Galega adaptamos unha selección de relatos de terror provenientes de diversos autores (Edgar Allan Poe, Paula Carballeira, W.W. Jacobs, Stephen King...) e os levamos ás aulas.  Foi moi divertido observar as reaccións sorprendidas dos nosos rapaces e rapazas ante unhas lecturas tan ben dramatizadas!!!