Blog Biblioteca IES Saturnino Montojo

  Durante o presente curso académico, e da man da nosa compañeira Alejandra Feal, a nosa biblioteca converteuse durante o cuarto martes de cada mes nun taller de origami. Esta iniciativa acadou unha resposta moi positiva entre o noso alumnado, que desfrutou dunha experiencia eminentemente creativa, pero tamén dunha actividade que le permitiu traballar a concentración, a coordinación e nocións matemáticas tan diversas como a aplicación de medidas de proporcións, creacións de figuras xeométricas ou desenvolvemento da visión espacial. Pero, sobre todo, supuxo un aporte incrible de relax e harmonía entre o noso alumnado máis novo.  

 Durante o presente curso académico, e coa axuda inestimable da nosa compañeira Lelé,  a nosa biblioteca converteuse nun taller de xadrez durante o segundo martes de cada mes. Foi esta unha actividade que acadaou un grande éxito entre o noso alumnado, moi afeccionado á práctica deste deporte. Realmente son moitos os beneficios que aporta o xogo do xadrez: paciencia, tolerancia, creatividade ou flexibilidade metal. No noso caso converteuse, ademais, en mecanismo de integración para varios alumnos provenientes do estranxeiro que chegaron ao noso centro educativo sen nocións de castelán ou galego. Foi este o estímulo que precisaban para converterse en membros cada vez máis activos da nosa comunidade educativa.

  Durante o presente curso académico, e da man dos nosos compañeiros do equipo da biblioteca Rocío Piñón, Julia Ríos e Álvaro Cabanas, os recreos do luns e o mércores convertéronse en punto de encontro para o noso alumnado afeccionado aos xogos de mesa.    Ademais de desfrutar coa experiencia lúdica, esta iniciativa permitiu que moitos rapaces e rapazas con dificultades de relación atopasen un lugar onde convivir cos seus iguais e que creasen lazos firmes de unión con outra xente en situación semellante.

 Coa intención de celebrar o día de Rosalía, convertemos aos nosos Correspondentes Xuvenís e Voluntarios de Biblioteca en recitadores profesionais por un día e invitamos a todo o alumnado do noso centro a escoitar na nosa biblioteca a emocionada lectura da obra rosaliana baixo o lema: "un poema, unha rosa".  Moitos e moitas se animaron a ler. E outros tantos e tantas participaron como público. Pero todos gozamos intensamente coa actividade. VÍDEO: RECITADO ROSALÍA1 VÍDEO: RECITADO ROSALÍA 2

  Coa intención de celebrar o Día da Poesía, o alumnado participante no noso Club de poesía organizou un recitado de poemas na biblioteca.   Foi un momento emotivo que nos permitiu reflexionar sobre a importancia desta manifestación artística para compartir emocións, sentimentos e sensacións varias, pero tamén para transmitir crenzas, coñecementos ou ideoloxía.  VÍDEO: Recitado 1  VÍDEO: Recitado 2