MAIO, MES CON G: ROTEIRO CASTELAO CO IES DE CATABOIS

 O pasado 27 de maio xuntamos ao noso alumnado do Club de narrativa de 4 ESO cos rapaces e rapazas do Club de lectura do IES de Catabois e viaxamos xuntos a Rianxo coa intención de facer o Roteiro de Castelao.

Foi unha xornada intensa que todos abordamos con enerxía.

Comezamos o noso camiño coa visita á casa do gran poeta Manuel Antonio.

Da man do noso compañeiro Alberto, coñecemos o seu pasado revolucionario e as súas ansias por participar tanto na Primeira Guerra Mundial coa Lexión Estranxeira francesa, como na Revolución Rusa de outubro.

Tamén coñecemos a súa amizade con Dieste, Risco ou Castelao, o seu contacto coas Vangardas, ou a influencia que supuxeron para a súa poesía o folklore popular galego, o saudosismo portugués ou os haikus xaponeses.

Non esquecemos tampouco o seu activismo político e cultural en compaña das figuras máis relevantes da época.

Ou a súa gran paixón polo mar, que tan ben reflectiu nos seus poemarios.

Un pouco tristes tras descubrir a súa morte precoz por tuberculose, abandonamos a casa de Manuel Antonio para achegarnos á vivenda de Castelao.

Na entrada desta edificación típica das vilas mariñeiras, repasamos parte dos fitos da vida deste autor que faleceu en Bos Aires hai 75 anos: a viaxe a Arxentina para que a familia se xuntase co pai emigrado, o nacemento das irmás, a volta a Galicia, os estudos de Medicina, o seu labor político inicial, os problemas coa vista, o abandono do seu labor de médico, o matrimonio, a morte do seu único fillo, o exilio en Estremadura, o comezo da Guerra Civil española ou a súa fuxida a América.

A continuación camiñamos ata a casa de Rafael Dieste.

   E comentamos que as familias dos tres autores, enriquecidas na emigración, ocuparon vivendas case contiguas nunha rúa (a de Abaixo), na que tradicionalmente se establecían os retornados que conseguiran mellorar a súa situación económica e social.

Para concluir o noso roteiro, e a modo de homenaxe, limos varios relatos de Castelao.

Continuamos a xornada coa visita ao Museo do mar da vila rianxeira.

Alí nos falaron da importancia do mar na economía e a cultura da zona.

E nos proporcionaron información sobre a actividade pesqueira tanto na actualidade coma no pasado.