FALADOIRO: LINGUA GALEGA, SI OU NON?

   

Con intención de analizar a situación da lingua galega na nosa comunidade, reunimos ao noso alumnado nun faladoiro na nosa biblioteca.

   O debate resultou moi intenso e ameno.

   Todos e todas coincidiron en que o emprego da lingua galega está nunha situación crítica e que deberiamos traballar para tratar de revertir un proceso que parece imparable. Foi maioritaria a opinión de que estamos ante un problema basicamente social derivado da perda de prestixio do galego na nosa comunidade. En relación coa idea anterior, puidemos coñecer de primeira man a opinión de alumnado estranxeiro, que observa con sorpresa os prexuízos de compañeiros e compañeiras no momento de empregar a lingua galega na súa vida cotiá.    

   As propostas para a mellora no emprego do galego foron moitas, e todas interesantes. 

 Houbo quen asegurou que unha parte do problema radica na escasa presenza do galego en produtos audiovisuais dirixidos aos máis pequenos (filmes, debuxos animados...), e tamén a un público adolescente e de mediana idade.

   Outra parte dos e das participantes asegurou que sería moi útil unha inmersión lingüística no mundo educativo consistente na impartición de todas as clases en lingua galega, a excepción da materias lingüísticas propias (Lingua Castelá, Lingua Inglesa e Lingua francesa).

   Tamén se aludiu á necesidade de que máis referentes no mundo do deporte, da ciencia ou das artes empreguen o galego como lingua de comunicación habitual.

   En resumidas contas: un día moi aproveitado!!!